Претседателката на ИСОС, Весна Прентоска и членови на Управниот одбор на ИСОС учествуваа на значајни меѓународни активности во март 2025 година, преку кои се потврдува меѓународната позиција и стратешката определба на Институтот за унапредување на професијата.
Учество на Министерската конференција на Светска банка во Виена
На 18 март, ИСОС беше дел од Министерската конференција „Финансиско и одржливо известување: ориентација кон зелената и дигиталната агенда“, организирана од Светската банка и Министерството за финансии на Австрија. Настанот обедини над 250 високи претставници од владите, професионалните тела, меѓународни институции и академската заедница од регионот на Европа и Централна Азија.
Темите на конференцијата беа насочени кон имплементација на новите стандарди за одржливо известување, дигиталната трансформација, улогата на јавните претпријатија во климатските политики, како и примената на вештачката интелигенција во сметководството и ревизијата. Присуството на ИСОС ја одразува неговата проактивна улога во поддршка на реформите и прилагодување кон новите глобални трендови.
Јубилеј на Сојузот на сметководители и ревизори на Србија – 70 години посветеност кон професијата
На 21 март 2025 година, во Белград, беше одбележан јубилејот 70 години од основањето на Сојузот на сметководители и ревизори на Србија (СРРС). По тој повод, СРРС додели златна плакета на ИСОС како израз на благодарност за долгогодишната соработка и регионалната поддршка во развојот на сметководствената и ревизорската професија.
Ова признание претставува значајна потврда за регионалната поврзаност и угледот на ИСОС како стратешки партнер во јакнењето на професионалните стандарди.
ИСОС на патот кон членство во престижната европска организација – Организација на даночни советници на Европа (CFE Tax Advisers Europe)
Паралелно со овие настани, ИСОС го објави и иницирањето на постапката за зачленување во Организација на даночни советници на Европа (CFE Tax Advisers Europe) – водечка европска организација на даночни советници основана во 1959 година со седиште во Брисел. CFE ги претставува и ги застапува интересите на даночните советници пред институциите на Европската унија и другите меѓународни тела, поттикнувајќи етички принципи, професионални стандарди и размена на најдобри практики.
Членството во CFE овозможува:
- Пристап до експертски анализи и публикации за даночните и регулаторните промени во ЕУ,
- Можности за вмрежување со професионалци од цела Европа,
- Учество во креирање на европски политики и стандарди во даночната сфера,
- Професионален развој преку обуки, семинари и работилници.
ИСОС е меѓу првите организации во поширокиот регион што ја започнува оваа постапка, што претставува значаен чекор кон унапредување на улогата на Институтот на европско и меѓународно ниво.
Со почит, Скопје, 28.03.2025
ИСОС
